لاہور (نمائندہ نوائے ٹیکسلا)پاکستان فلور ملز ایسوسی ایشن کے سینٹرل چیئرمین عاصم رضا احمد اور پنجاب برانچ کے چیئرمین چوہدری افتخار احمد مٹو نے پنجاب حکومت کی جانب سے گندم کے اجرائی نرخوں پر ردِ عمل کا اظہار کرتے ہوئے کہا ہے کہ حکومت پنجاب کی جانب سے اعلان کردہ گندم کے اجرائی نرخ4700روپے فی من غیر حقیقی ہیں، تاریخ میں ایسا کبھی نہیں ہوا کہ 3900روپے فی من میں زبردستی خریدی گئی گندم 4700روپے فی من کے نرخوں پر فروخت کی جائے۔پاکستان فلور ملز ایسوسی ایشن ان نرخوں کو مسترد کرتی ہے۔ پوری فلور ملنگ انڈسٹری سراپا احتجاج ہے۔ اگر ایسا ہی کرنا تھا تو گندم کی کٹائی کے سیزن میں فلور ملز کو بھی گندم خریداری کی اجازت دی جانی چاہئے تھی۔ اس کے برعکس فلور ملز کو کٹائی کے سیزن میں گندم خریدنے نہیں دی گئی۔ فلور ملز یہاں تک کہ لوگوں کے گھروں سے زبردستی گندم اٹھائی گئی۔ اب یہی گندم مہنگے داموں فلور ملز کو فروخت کی جارہی ہے، جس پر فلور ملز ایسوسی ایشن اپنے احتجاج کا حق محفوظ رکھتی ہے۔رہنماوں کا کہنا تھا کہ اعلان کردہ نرخوں کو فوری واپس لیا جائے اور ان کا از سرِ نو جائزہ لیکر نئے نرخوں کا اعلان کیا جائے انہوں نے نگران وزیرِ اعظم پاکستان انوارالحق اور آرمی چیف سےّد عاصم منیر سے اپیل کی ہے کہ اس معاملے کا فوری نوٹس لیں اور اعلان کردہ گندم کے اجرائی نرخوں کی واپسی اور نئے نرخوں کے اعلان کیلئے اقدامات کریں، اس معاملے کی بھی تحقیقات کی جائیں کہیں یہ گندم امپورٹ کرنیوالوں اور ناجائز منافع خور گندم مافیا کی سرپرستی تو نہیں کی جارہی۔
