, , ,

بابا گرو نانک دیو جی کے557ویں جنم دن کی تقریبات 22 نومبر سے یکم دسمبر تک جاری رہیں گی، سکھ یاتریوں کے لیے فول پروف سکیورٹی انتظامات مکمل

اسلام آباد (خصوصی رپورٹ ، سید عمیر علی ) سکھ مذہب کے بانی بابا گرو نانک دیو جی کے557ویں جنم دن کی تقریبات کے سلسلے میں ننکانہ صاحب میں سکھ یاتریوں کی آمد کے لیے سیکیورٹی، رہائش، ٹرانسپورٹ، صفائی ستھرائی، کھانے پینے اور دیگر بنیادی سہولیات کے انتظامات مکمل کر لیے گئے ہیں، جبکہ تقریبات 22 نومبر سے یکم دسمبر تک جاری رہیں گی۔ اعلیٰ سطحی اجلاس میں متعلقہ حکام کو یاتریوں کی سہولت، حفاظت اور مذہبی رسومات کی ادائیگی کے لیے تمام انتظامات مؤثر بنانے کی ہدایات جاری کی گئی ہیں۔بریفنگ کے مطابق بابا گرو نانک دیو جی کے جنم دن کی تقریبات میں دنیا بھر سے تقریباً 30 ہزار جبکہ بھارت سے 3 ہزار سکھ یاتریوں کی شرکت متوقع ہے۔ یاتریوں کو ننکانہ صاحب کے علاوہ فاروق آباد، شیخوپورہ، حسن ابدال، کرتارپور، نارووال اور لاہور سمیت مختلف مذہبی و تاریخی مقامات کی زیارت بھی کروائی جائے گی۔تقریبات کے دوران سیکیورٹی کے فول پروف انتظامات یقینی بنانے کے لیے ننکانہ صاحب میں 5 ہزار سے زائد پولیس افسران اور اہلکار تعینات کیے جائیں گے، جبکہ شہر اور اہم مقامات کی نگرانی کے لیے 420 سی سی ٹی وی کیمرے نصب کیے گئے ہیں۔ سیکیورٹی نگرانی کے لیے قائم کنٹرول رومز کو بھی مکمل طور پر فعال کر دیا گیا ہے تاکہ یاتریوں کی آمد و رفت، مذہبی تقریبات اور دیگر سرگرمیوں کی مسلسل نگرانی کی جا سکے۔انتظامیہ کی جانب سے شہر بھر اور گوردواروں میں صفائی ستھرائی، رہائش، کھانے پینے اور دیگر ضروری سہولیات کے خصوصی انتظامات کیے گئے ہیں۔ گوردوارہ جات میں طبی سہولیات کے لیے ہسپتال اور فسیلیٹیشن ڈیسک بھی قائم کیے گئے ہیں، جہاں یاتریوں کو رہنمائی، معاونت اور ضروری خدمات فراہم کی جائیں گی۔ ننکانہ صاحب کو جنم دن تقریبات کے دوران گیس اور بجلی کی لوڈشیڈنگ سے مستثنیٰ رکھنے کے انتظامات بھی کیے گئے ہیں، جبکہ متعلقہ افسران اور عملے کی چھٹیاں منسوخ کر دی گئی ہیں تاکہ انتظامی امور میں کسی قسم کی رکاوٹ پیدا نہ ہو۔صوبائی وزیر اقلیتی امور سردار رمیش سنگھ اروڑہ نے بتایا کہ بابا گرو نانک دیو جی کے جنم دن کی تقریبات کا آغاز اکھنڈ پاٹ کی مذہبی رسم سے ہوگا، جبکہ 24 نومبر کو گوردوارہ جنم استھان ننکانہ صاحب میں مرکزی تقریب منعقد کی جائے گی، جس کے ساتھ نگر کیرتن کا جلوس بھی نکالا جائے گا۔ انہوں نے کہا کہ مذہبی تقریبات کے انعقاد کے لیے تمام متعلقہ ادارے باہمی رابطے اور تعاون کے ذریعے انتظامات مکمل کر رہے ہیں تاکہ سکھ یاتری عقیدت و احترام کے ساتھ اپنی مذہبی رسومات ادا کرسکیں۔سیکرٹری داخلہ پنجاب ڈاکٹر احمد جاوید قاضی نے کہا کہ جنم دن کی تقریبات میں شرکت کے لیے آنے والے سکھ یاتریوں کی حفاظت حکومت کی اولین ترجیح ہے۔ انہوں نے متعلقہ افسران اور اہلکاروں کو ہدایت کی کہ ڈیوٹی کے دوران یاتریوں کے ساتھ خوش اخلاقی، احترام اور بھرپور تعاون کا مظاہرہ کیا جائے اور محکمہ داخلہ پنجاب کی جانب سے جاری کردہ سیکیورٹی گائیڈ لائنز پر من و عن عملدرآمد یقینی بنایا جائے۔انہوں نے تمام متعلقہ اداروں کو ہدایت کی کہ سیکیورٹی، ٹریفک مینجمنٹ، رہائش، طبی امداد اور دیگر سہولیات کے انتظامات میں مکمل ہم آہنگی برقرار رکھی جائے اور کسی بھی ممکنہ صورتحال سے نمٹنے کے لیے تمام ضروری اقدامات پہلے سے یقینی بنائے جائیں، تاکہ مذہبی تقریبات پرامن ماحول میں منعقد ہوں اور یاتریوں کو کسی قسم کی مشکلات کا سامنا نہ کرنا پڑے۔

**گردوارہ جنم استھان ننکانہ صاحب کی تاریخی و مذہبی اہمیت**

 

گردوارہ جنم استھان ننکانہ صاحب سکھ مذہب کے بانی بابا گرو نانک دیو جی کی جائے پیدائش ہے اور سکھ برادری کے لیے دنیا کے مقدس ترین مذہبی مقامات میں شمار ہوتا ہے۔ یہ تاریخی گردوارہ ضلع ننکانہ صاحب میں واقع ہے اور سکھ مذہب کے پیروکاروں کے لیے عقیدت، روحانیت اور مذہبی وابستگی کا عظیم مرکز ہے۔

اس مقدس مقام کی اہمیت نہ صرف سکھ برادری بلکہ بین المذاہب ہم آہنگی، محبت، احترام اور امن کے حوالے سے بھی نمایاں ہے۔بابا گرو نانک دیو جی 15 اپریل 1469ء کو رائے بھوئی کی تلونڈی میں پیدا ہوئے، جو بعد ازاں ان کے نام سے نانکیانہ اور پھر ننکانہ صاحب کہلایا۔ ان کے والد مہتا کالو مقامی سطح پر پٹواری کے فرائض انجام دیتے تھے۔ تاریخی روایات کے مطابق اس مقام پر پہلی یادگاری تعمیر گرو ہرگوبند صاحب کے دور میں 1613ء میں کروائی گئی، جبکہ موجودہ شاندار گردوارے کی تعمیر و تزئین میں مہاراجہ رنجیت سنگھ کے دور میں نمایاں کام ہوا۔گردوارہ جنم استھان سکھ طرز تعمیر کا خوبصورت نمونہ ہے، جس میں سفید سنگ مرمر، سنہری گنبد اور دلکش تعمیراتی نقوش اس کی تاریخی و مذہبی عظمت کو نمایاں کرتے ہیں۔ ننکانہ صاحب شہر میں متعدد تاریخی گردوارے موجود ہیں، تاہم گردوارہ جنم استھان مرکزی حیثیت رکھتا ہے اور دنیا بھر سے سکھ عقیدت مند یہاں حاضری دیتے ہیں۔ننکانہ صاحب کی تاریخ میں 21 فروری 1921ء کا سانحہ بھی انتہائی اہمیت کا حامل ہے، جب گردواروں کے انتظام اور مہنتوں کے خلاف اصلاحی تحریک کے دوران گردوارہ جنم استھان میں نہتے سکھوں کا قتل عام ہوا۔ اس واقعے کو سکھ تاریخ میں ایک المناک سانحے کے طور پر یاد کیا جاتا ہے اور اس نے گردواروں کے انتظامی نظام میں اصلاحات کی تحریک کو تقویت دی۔ہر سال بابا گرو نانک دیو جی کے جنم دن، جسے گرو نانک گرپورب کے نام سے منایا جاتا ہے، دنیا بھر سے سکھ یاتری ننکانہ صاحب پہنچتے ہیں۔ اس موقع پر اکھنڈ پاٹھ، مذہبی تقریبات، نگر کیرتن، خصوصی دعاؤں اور لنگر کا اہتمام کیا جاتا ہے۔ پاکستان میں ان تقریبات کا انعقاد مذہبی سیاحت، بین المذاہب ہم آہنگی، ثقافتی روابط اور امن کے پیغام کو فروغ دینے کا اہم ذریعہ بھی ہے۔بابا گرو نانک دیو جی کے جنم دن کی تقریبات کے لیے مکمل انتظامات اور سیکیورٹی اقدامات کو پاکستان کی جانب سے سکھ یاتریوں کے مذہبی جذبات کے احترام، مذہبی آزادی اور بین المذاہب ہم آہنگی کے فروغ کی کوشش قرار دیا جا رہا ہے، تاکہ دنیا بھر سے آنے والے زائرین محبت، امن اور بھائی چارے کے ماحول میں اپنی مذہبی رسومات ادا کر سکیں۔ ننکانہ صاحب میں بابا گرو نانک دیو جی کے 557ویں جنم دن کی تقریبات کے سلسلے میں سرکاری و نجی تعلیمی ادارے بند رکھنے کا نوٹیفکیشن جاری کردیا گیا۔

متعلقہ خبریں

ڈہرکی کی ست رام پوری کالونی میں پالکی صاحب اور گرو کی سنگت کا پرتپاک استقبال, جمعہ کو مذہبی عقیدت و احترام کے ساتھ خصوصی استقبالیہ تقریب

November 20, 2026 | Dr Syed Sabir Ali

ڈہرکی(نوائے ٹیکسلا رپورٹ ) ست رام پوری کالونی ڈہرکی میں جمعہ کو پالکی صاحب (گرو مہاراج) اور گرو کی سنگت کا انتہائی عقیدت و…

مزید پڑھیے ←

جناح زیدی لائبریری کامسیٹس میں فن و ثقافت کے دو رنگا رنگ پروگرام، طلبہ کی تخلیقی صلاحیتوں اور بین الثقافتی مکالمے کو فروغ

November 20, 2026 | Dr Syed Sabir Ali

اسلام آباد( نمائندہ نوائے ٹیکسلا ) کامسیٹس یونیورسٹی اسلام آباد کی جناح زیدی لائبریری میں قائم کامسیٹس آرٹ گیلری کے زیرِ اہتمام فن، ثقافت…

مزید پڑھیے ←

ورلڈ کلچر فیسٹیول کراچی میں امریکی فن، موسیقی، سائنس اور ٹیکنالوجی کی نمائش، امریکی و پاکستانی فنکاروں کی مشترکہ پرفارمنس

November 20, 2026 | Dr Syed Sabir Ali

کراچی (کلچر رپورٹر ، نوائے ٹیکسلا )امریکی قونصل خانہ جنرل کراچی نے آرٹس کونسل آف پاکستان کراچی کے اشتراک سے منعقدہ ورلڈ کلچر فیسٹیول…

مزید پڑھیے ←